16.07.2024
Уйбаан Хотуоһап - АҔАЛАР КҮННЭРИНЭН!

АҔАЛАР КҮННЭРИНЭН!

Арассыыйа бүттүүнүн үрдүнэн
Аҕалар күннэрин бэлиэтиир,
Аламай үөрүүлээх күммүтүн
Айхаллыы көрсүөҕүн, доҕоттоор!

Аҕа диэн - алаһа дьиэбитин
Арчылыыр, араҥаччылыыр аналлаах,
Ийэ уус ууһуурун төлкөлүүр
Иһирэх дууһалаах киһибит.

Дьиэ кэргэн эйэлээх олоҕор
Дьол - соргу толору буоларын,
Түстэһэр анала, соруга
Толору сүгүллэр - аҕаҕа.

Аҕа диэн - айылҕа киһитэ
Аар тайҕа сонордьут булчута,
Аал уотун алгыһын ылыммыт
Айыыһыт Байанай оҕото.

Түүннэри - күннэри кыһаллан
Түбүктээх ыарахан үлэнэн,
Буларгын - таларгын, сатыыргын
Барытын аныыгын бар дьоҥҥор.

Истиҥник таптыырбыт бэлиэтин
Иһирэх тылынан этэммин,
Эйиэхэ барытын аныыбын
Эрэллээх киһибэр - АҔАБАР!

Уйбаан Хотуоһап
Уус Таатта,  17.10.2021 с.

267 ebitem2
Комментарии:
avatar