. Сур Бөрө

Туундара устунан сатарыыр
Сур бөрө улуйар хаһыыта.
Ыас хара былыттаах түүҥҥүну
Аймаата адьырҕа ыһыыта.

Аччыктаан хараҕа уоттанан
Аһыыта килэйэн килбэҥниир.
Куртаҕа курулаан курдургуур
Кураанах куолайа өҕүйэр.

Тунал хаар үрдүгэр туртаҥнаан
Тугутчаан тураары үнүөхтүүр.
Аттыгар Ийэтэ барахсан
Атара көтүөлүүр эргийэ.

Адьырҕа олоотоон сыт ылан
Аһаабыт кэриэтэ астынна.
Арҕаһын түүлэрин туруоран
Амтанын билбиттии салбанна.

Тугутчаан атаҕар турбутун
Ийэтэ кый ыраах күрэттэ.
Туундара систэрин уҥуордаан
Тунал хаар үрдүнэн түһүннэ.

Адьырҕа абаран улуйда
Аймаата уу чуумпу түүҥнүнү.
Аһыытын таһааран килэттэ
Аччык ис куртаҕа курдурҕаан.

Ф. Аммосов. Хоһуун Уол. Найба. Булуҥ.