Тыа сирин сахатын дьахтарын
Хоһоонноон хоһуйуо эбиппин,
Итиикэн тыллары таламмын
Көр сатаан сааһылыы туппатым.
Чэрдийбит үлэһит илиитин
Сымнаҕас көмүскэ тэҥниэхпин,
Тугуй, ноо сымнаҕас көмүс диэн
Ол эмиэ туохпутуй диэхтэрэ.
Ыар үлэ мускуйбут таһаатын
Нап-нарын хатыҥҥа тэҥниэхпин,
Дьэ киһи, дьэ булан тэҥнииигин
Хатыҥнаах буолара диэхтэрэ.
Саталлаах булугас өйдөрүн
Тииҥ мэйии буолаҕыт диэрибин,
Тииҥ өйүн эн хаһан көрөҥҥүн
Диэбиттээх мин биирдэ эппиппэр.
Сааскы күн чочуйбут мөссүөнүн
Ньургуһун курдуккун диэбиппэр,
Кытаат бар үргээн кэл сибэкки
Ол кэннэ тэҥнээ дуу диэхтэрэ.
Чэ баҕар ким сиилиир сиилээтин
Ким баҕар утардын хайаатын,
Тыам сирин сахатын дьахтарын
Ханнык да көмүскэ биэрбэппин.
Тымныыга эриллэн мускуллан
Куйааска итиигэ сыраллан,
Үлэттэн чаҕыйбат киһини
Дьиҥ чахчы убаастыыр эбиппин.
П.Новиков-Дьүкээбил