Биһиги Кыайыыбыт

Халыйан кэлбит хараҕыҥ уутун
Кыбыста туттан кистээмэ, саллаат!
Сир үрдүн дьонун сидьиҥтэн быыһаан,
Сүтүгүн иэстээн
  сиппитиҥ ирдээн.

Бэтэрээн буойун, саныыгын бүгүн
Сэбиэскэй норуот сомоҕо күүһүн -
Бүлүмүөт уотун түөһүнэн боппут,
Тааҥкаҕа сыыллан утары турбут,

Халлааҥҥа хапсан "Мессери" таппыт,
Муораҕа өстөөх хомбуойун хоппут,
Буойаһы эспит бартыһаан уолчаан -
Турбута дойду биир сыалы санаан.

"Эстибит Сойуус ахсааҥҥа киирбэт,
Биһиги баарбыт - фашиһы кыайбыт!" -
Акыйаан нөҥүө балыйсар саҥа
Уордайыы уоҕун уматта хааҥҥа.

Тыыннаахтар бары тахсыаҕыҥ, эн, мин,
Аан дойду көрдүн, киммитин биллин!
Дьиэ кэргэн ахсын кэриэстиир дьону
Ааттарын ааттаан, күөрэччи тутуҥ!

Бырааттыы ииҥҥэ чиэс биэрэ мустуох,
Нөргүйэн тыыннаах сибэкки ууруох,
Сүһүөххэ туран чуумпуран ылыах,
Умнубат иэһин ыччакка этиэх!

Лидия Андросова 21.04. 2019с.  Төҥүлү "Таммахтар".