Хатыҥым
Хатыҥым хоҥкуйда,нуоҕайан
Сайынныын арахсар күнүнэн
Ытарҕа симэҕин уһулан
Оргууйдук санньыйда чуумпуран.
Мэник тыал эргийэ көтүөлээн
Үҥкүүгэ ыҥыра кууспахтыыр
Сэрэнэ ааттаһа сипсийэн
Тулатын сырдата оонньотор.
Дьэрэкээн саһархай киэргэлэ
Ыраахтан долгута эйэҥниир.
Уйаннык биэтэҥниир кэрэтэ
Сүрэҕи угуйа абылыыр.
Хаһыҥҥа кэтиэҕэ дуй сонун
Күлүмнэс мөһүүрэ күндүтүн
Симиктик туттуоҕа кылбайа
Нарыннык биһиккэ сууланыа.