Ийэ барахсан мэлдьи эдэр сылдьыбат,
Кырдьар, түөс-маас буолар, бэйэтин  кыаммат.
Илдьэ кэлбит майгыта олох бараммат,
Кырдьаҕас ийэ иирсэри сөбүлээбэт:
"Ойоххун кытта,тоойуом, этиһимэ даа,
Оҕолоруҥ котокулары мөҕүмэ,
Олоруҥ иллээхтик  бу орто дойдуга,
Букатын кэлбит суох ээ бу кэрэ сиргэ."
Сарсыарда эрдэ туран хаччыгынайар,
Чэй өрөн букунайар, күнүс утуйар.
Кийиит бэйэтэ ас астаары кыыһырар,
Кырдьаҕас киһини сынньатыан баҕарар.
Оскуолаҕа, детсадка сиэннэрдиин барсар,
Уолун, кийиитин өрүү уһугуннарар  -
"Өссө да эрдэ дии,"-  диэн  өһүргэнэллэр,
"Тоҥсуйан, тыаһаан бүт, эмээхсин,"- дэһэллэр.
"Эмиэ былыргытын  ахтан барда, чэ бүт,
Тэлэбиисэри куччатыма, баабыска,
Талырдаама даа, утуй, сыт, айака,
Үчүгэй сериалы түүннэри көрөбүт.
Араадьыйаҥ  тыаһа тоҕо  улаханай, Араар, сарсыарда туох айдаанай!" 
Өрөбүлгэ да сүгүн ийэ сынньаппат.
Үлэҕит күнүгэр утуйан быстыбат.
Түүн туран хааман көрүдүөргэ талырдыыр,
Дьиэ иһинээҕи дьону барытын аймыыр.
Арыт дьүөгэтигэр бииргэ баран хонсор,
Арыт оһуокайга чөкөллөн олорсор.
Биир үтүө күн балыыһаҕа тиэллибитэ,
Онтон...онтон оҕолоро көмпүттэрэ...
Ыраахтан кэлбиттэр күн ытаспыттара,
Түргэнник хомунан бүтэн барбыттара...
Билигин дьиэ иһигэр сарсыарда чуумпу:
Араадьыйа хардьыгынаабат, айдаарбат,
Ким да хааман түүнүн талырдаабат буолбут,
Ким да тугу да ыйыппат, ыаһахтаабат.
Эр киһи сарсыарда үлэтигэр ыксыыр,
Тымныы чэйи чааскыга куттан ыймахтыыр,
Оҕолорун кытта дьахтарбыт айманар,
Оскуолаҕа, детсадка илдьэр, атаарар.
Кэннилэрин бары хайыстахтарына,
Ким да суох түҥ балай  килэгир түннүккэ,
Хамсаабат кэлэргэ түннүк түүл сабыыта,
Ааннара хатыылаах сэттэ уон күлүүскэ.
Ким да түүннэри манаспат кинилэри,
Ким да куппат үүттээх барбыт итии чэйи.
"Эбээбит ханнаный?"- кырачаан ыйытар,
Күн аайытын кураанах хоһу өҥөйөр.
Кэмпиэт амсайаары хомуоту хасыһар,
Тугу бары сүтэрбиттэрин өйдөтөр...
Ийэлэрин кытта тапталы көмпүттэр,
Кэпсэтэр истиҥ кистэлэҥин билбэккэ,
Истэр сүрэх иэйиитин кэрэхсээбэккэ
Кырдьаҕас ийэлэригэр эппэтэхтэр...
Көрүҥ-харайыҥ кыаммат ийэлэргитин,
Кыыһырымаҥ көрбөт-истибэт эмээхсин  диэн , 
Кыбыстымаҥ мырчыстыбыт  дьүһүнүттэн,
Кыра оҕо курдук буолбут мэйиититтэн. 
Махтаныҥ киниэхэ тыыннааҕар, оҕолор,
Ийэлээх оҕо буолан сылдьаргытыгар,
Махтаныҥ бу сиргэ баарыгар, доҕоттор.