Өр да өр күүттүм сайыны,
Айылҕам чэчирии турарын.
Чээлэй күөх солкотун суугуна
Оргууйдук сипсийэн ыллыырын.

 Өр да өр күүттүм сайыҥҥы
Сылаас тыал иэдэспин бигиирин,
Ойуурга минньигэс дьэдьэним
Сытынан муннубун уртуурун.

Өр да өр күүттүм ойуур тыа
Кэпсээнньит кэҕэтин куолаһын,
Хас талах аайытын чыычааҕым
Чуопаарар чаҕылхай ырыатын.

Өр да өр күүттүм үрүйэ
Күлүмнүү долгуйа сүүрэрин.
Тыала суох уу нуурал киэһэҕэ
Сиэркилэ ньуурунуу күөл үрдүн.

Өр да өр күүттүм сайыҥҥы
Былытым уон араас көстүүтүн,
Ардыгар ардахпыт кэнниттэн
Дьэрэкээн кустуга тахсарын.

Өр да өр күүттүм хотуурум
Күөх окко күүлэйдиир үөрүүтүн,
Киэһэнэн сиик сиргэ түһүүтэ
Сылайан дьиэ диэки хаамарбын.

Өр да өр күүттүм ходуһа
Толору бугуллаах турарын,
Оппутун кэбиһэн бүтэрээт
Күрүөтүн оҥорон кээһэрбин.

Өр да өр күүттүм сайыны
Бары да күүтэрбит буолуоҕа,
Айылҕа уһуктан чэлгийэ
Туох бары киэркэйэ тупсуутун.

П.Новиков-Дьүкээбил