Ньукуолуҥҥа

Саха сыла эргийдэ!
Саҥа дьыла дьэ кэллэ!
Сааспыт сыалын ситистэ -
Сайыҥҥыга аҕалла!

Лабаа аайы күөх солко
Мутукчабыт тылынна,
Сирим - дойдум биир сылга
Саҥа тыынын ылынна.

Саҥа олох оргуйуо,
Саҥа - иҥэ сатарыа,
Көтөр - сүүрэр күйгүөрүө,
Көй салгыны толоруо.

Атыыр , үөрүн салайан,
Атаралаан сүүрүөҕэ,
Сыспай сиэлэ сыыйыллан
Салгын хоту устуоҕа.

Сайылыкка ыал көһөн
Һай - һат буолан, турунуо,
Хотолдьуһан, субуһан
Хампа күөххэ дьулуһуо.

Кэрэхсэтэн, кукууктаан
Кэҕэ көтөр чоргуйуо,
Ытык Эбэм маанылаан
Ыам соботун бэлэхтиэ.

Алаадьылаан, Аал уоту
Айах тутан, алгыахпыт,
Үгэс буолбут булпутун -
Сааскы куһу ууруохпут.

Нарын - наскыл, кэлбиккэр,
Ньукуолуҥҥа, бу күҥҥэ!
Күөххэ көҥүл көччүтэр -
Күөгэл - нусхал - сайыҥҥа!

Лидия Андросова 22. 05. 2019
    Төҥүлү "Таммахтар".